蛋撻絕對係香港嘅地道美食，你又有無諗過，原來喺屋企一樣可以食到新鮮出爐嘅蛋撻呢？今日就同大家睇下！

首先睇睇蛋撻皮需要嘅材料：
無鹽牛油 65 克
砂糖 25 克
雞蛋 半 隻
低筋麵粉 110 克
少少鹽

而蛋漿就需要：
熱水 100 毫升
砂糖 50 克
鮮奶 40 克
雞蛋 1隻半-2隻

我哋首先將無鹽牛油室溫放軟，加入砂糖之後用打蛋機打勻。再打散一隻雞蛋，倒一半落去打勻。然後就可以將低筋麵粉過篩拌入去，加入鹽後繼續打勻。完成步驟後，將麵糰放入雪櫃大約30-40分鐘。

依個時候，我哋就可以準備蛋漿。先用100毫升嘅熱水溶解砂糖，倒入奶同雞蛋，慢慢攪拌成蛋漿。

之後將雪好嘅麵糰拎返出嚟分成六份，放入蛋撻模後用拇指按壓，因為麵糰有油同埋彈性，要壓多幾下先可以定倒型。再倒入蛋漿至9成半滿。預先將焗爐預熱到200度之後，將蛋撻放入焗爐中層焗大約25分鐘。當見到蛋撻皮焗至金黃，蛋漿微微脹起之後，就代表完成喇！

出爐嘅蛋撻梗係要熱辣辣食先得啦，而家我就即刻試一試先！希望唔好太甜啦！好食呀！個餡唔算好甜，但好香好香蛋撻味，頭先只係用咗個半鐘頭時間就可以做好呢個蛋撻喇！你都可以試吓㗎！